3Jo | WSK | STEP |

3 JOHN

Kari tam gawa imi batogam mu Jesus ko olekem John agila, bare nu ko nup wetang te me balam. Kris alo nunga kausa kariimet sang wonong wonong geraga se Kaem ko den apura ura bitakasan, se Kris alo turom suwanta agi ilagala agi ko nunga bitarukasan. Kari Gaius mu saonga ura umutang yawarakala bitakaso (5-8), bare Diotrephes mu supuling lagakaso (9-10).

3 John

Den gira

1 Ani Kris kari supuling, ani den imi bataguru ni Gaius kisisam. Ni aninga bo yawara, ani ninguru ka kuesam.

2 Se aga bo, ani nika dera yawarakala bagoso se ko ikisam iwitatala, ka kimik guang yawarakala se mel yawara la kimik te aratukko ani Kaem aru manorsam. 3 Ulengkala launuria sang aningate taiman, ale ni den nunguning ilukuawusam ale tom suen biya te aolak ilusam wore ko aninga manorman. Se ikiem ale nika ninguru amilmilerem. 4 Aninga kuriang alo nuna den nunguning karo tusan se ani nunga den ikisam, mu ani ninguru ko amilmilasam. Se amilmil saki mu amilmil ani betesam imi kiara me ikiso.

Gaius saonga ura yawarakala bitakaso

5 Aga bo, ni Kris launuria saki nenengate taisan mu nunga gisam ale nunga sinar tasam, mu ni yawarakala betesam. Nuna awar ko taisan, se ni me nunga ikia tala, bare ni am nunga sinar tasam. 6 Se nuna ni gemang nungarsam ale nunga sangorsam mu ko dugu duap Kris alo imi te mu nunga manorman se ikiman. Se aga bo, munan Kaem te amilmilurukko mu te la nunga sangaru se namomonko. ^{▼▼3 John 1:5-8 Kariimet awar taira nunga sinar tata: Rom 12:13; Hebrews 13:2; Titus 3:13.} 7 Mu awuk, nuna Kristus ko dugu duap balmon se nup barasukko nama gilingisan. Ale nuna kariimet Kris mena mu nongote melmasak gimonko me ko kuesan. 8 Se ana am nunga sangornak ale te arungak den nunguning ko ura betenakko.

Diotrephes munan memek bitakaso, bare Demetrius mu munan ningo bitakaso

9 Ani tam gawa tukunang bo maingkala bataguru ningarem. Bare kari Diotrephes mu nu kota supuling biya bagurukko kaeso, ale nu anananga den ikiokko me kueso. 10 Buta se ani nengete nama aratik, mu nu munan beteso mu ko den ani diram la balikko. Nu ana nago ko den kawel, se den memek ngual ngual balso. Bare mu la mena. Nu Kris launuria saki taisan, mu nu amilmil me nungarso, ale arungak ko kawam te me namoso. Ale kariimet saki butata betemonko negesan, mu nu nunga lage agotala kaloso, ale nunga karoso ale udagi Kris alo nunga ningi me bagomonko ma balso.

11 O aga bo, ni munan memek me karo tuiko, ni munan ningo diram mu la karo tuiko. Awiriya munan ningo beteso, mu nu Kaem ko kari. Bare awiriya munan memek beteso, mu nu Kaem me arigam ale me ko ikiso.

12 Kariimet suen biya kari Demetrius ko dugu duap yawarakala balsan. Mu nu den nunguning ninguru karo tuso se arigisan. Se ana agotala ko nup patowasan, se ni ikisam, anananga den mu nunguningta.

Den nukum

13 Ani den suen biya ka manikko, bare tam gawa te bataguru kisekko me kuesam. 14 Mu awuk, ani tairik karkikko tom pingi aram agila. Aninga angamang butata aniso. Asele analak wete ninguru munakanakko.

15 Gemang lila te bagerko. Nika singsang imi te bagasan mu nunga den amilmil ni kisisan. Se ni aninga den amilmil anananga saki alo ago nungaruko.